Ode til gleda - Beethovens 9. symfoni i Sykkylven

Fredag den 28. august tek Rune Bergmann og Fjord Cadenza heile storproduksjonen vidare frå Ålesund til Sykkylven kyrkje. 150 utøvarar samla i eit kyrkjerom gir Beethovens monumentale musikk ein heilt eigen klang og nærleik. Med seg har han solistane Jacquelyn Wagner, Marianne Beate Kielland, Markus Bjørlykke og Magne Fremmerlid, Ensemble Allegria, Sjøforsvarets musikkorps, Ålesund vidaregåande skule sitt musikklinjekor og Ålesund kammerkor

Beethovens niande er eit monument i musikkhistoria. Då han fullførte si siste symfoni var han praktisk talt heilt døv – å miste hørselen for ein komponist er som å miste synet for ein billedkunstnar. Likevel, eller kanskje nettopp difor, skapte han eit verk som framleis set verda i ærefrykt, over 200 år seinare. Fire satsar som går frå mørke og kamp til det som i fjerde sats eksploderer ut i «Ode til gleda» – Friedrich Schillers hyllest til fellesskap, fridom og menneskeleg verdigheit.